21 лютага ва ўсім свеце адзначаюць Дзень роднай мовы – цудоўнае свята, якое аб’ядноўвае людзей у адзіную нацыю, дазваляе ўспомніць пра свае карані, традыцыі і Радзіму. Бо нельга ўявіць сабе Радзіму, нацыю без таго, што звязвае чалавека з яго родным краем і народам – без мовы. Бібліятэка-філіал №4 ім. М.Лермантава ў адзіны этна-тыдзень “Мода на мову” падрыхтавала шмат цікавых выстаў, фотазон і іншых пляцовак у залах бібліятэкі асабіста да гэтага свята.
Да 140-годдзя з дня нараджэння вялікіх песняроў зямлі беларускай – Янкі Купалы і Якуба Коласа – у чытальнай зале падрыхтавана выстава-віншанванне “Волаты беларускай літаратуры: Янка купала і Якуб Колас”. Жыццёвыя абставіны, літаратурнае станаўленне паэтаў, асаблівасці іх творчасці і шмат іншага прадстаўлена на выставе для нашых чытачоў.
Каб не забыцца пра свае карані, не згубіць сувязі з народам, трэба ведаць сваю родную мову. А каб лепш валодаць моваю, трэба шмат чытаць. Таму на выставе-аглядзе “Каб мова беларуская гучала” прапанаваны лепшыя творы беларускай літаратуры за ўвесь час яе існавання – ад мінулага да сучасных дзён.
А каб маладое пакаленне не страціла сваёй спадчыны, трэба з маленства прывіваць цікавасць да нацыянальнай самабытнай культуры, любоў да беларускай мовы. Таму ў сектары па рабоце з дзецьмі для юных чытачоў арганізаваны цікавыя інтэрактыўныя пляцоўкі. На выставе-прапанове “Будзь сучасны – чытай беларускае” прадстаўлены лепшыя сучасныя кнігі на беларускай мове для дзяцей. Інтэрактыўная фотазона “Мода на мову” прапануе не толькі зрабіць цікавыя фотаздымкі, а таксама прыняць удзел у промаакцыі “Маё слова” і пакінуць сваё любімае слова на беларускай мове. А ў беларускім куточку хлопчык і дзяўчынка у нацыянальным адзенні запрашаюць да міні-акцыі “Далучы сваю далонь”, каб кожны жадаючы мог пакінуць некалькі прыемных слоў пра родную мову.
